د سرچینو په وینا، هغه به د دغه څلور ورځني سفر پر مهال د هند له لوړ پوړو دولتي چارواکو سره پر افغان سوله او د دواړو هېوادونو تر منځ د همکاریو پر پراخېدو بحث وکړي.
د یادولو وړ ده چې عبدالله عبدالله تر دې وړاندې پاکستان هېواد ته سفر کړی و.
نوموړي هلته د پاکستان له لومړي وزیر عمران خان، جمهور رییس عارف علوي او د دغه هېواد د بهرنیو چارو له وزیر شاه محمود قریشي سره پر افغان سوله خبرې وکړې.
عمران خان له ډاکتر عبدالله عبدالله سره په کتنه کې ویلي وو چې په افغانستان کې سوله د پاکستان د سترې بریا لامل کېږي او اسلام اباد ته ډېر اقتصادي ارزښت لري.
د سیمې او ګاونډیو هېوادونو ته د عبدالله سفر پر داسې مهال ترسره کېږي چې لاهم د افغان سولې مرکچي پلاوي د خبرو پر کړنلاره نه دي سلا شوي.
