سرچینه وایي، هغه دغه هېواد ته له رسېدو سره سم د تاجکستان له جمهور رییس امام علي رحمان سره کتلي او له ده سره یې پر افغان سوله بحث کړی دی.
د سرچینې په وینا، د تاجکستان جمهور رییس په دې لیدنه کې زلمي خلیلزاد ته د افغان سولې په برخه کې د هر ډول ملاتړ او همکارۍ ډاډ ورکړی.
بلخوا، امام علي رحمان په خپلو خبرو کې د افغانستان له لوري د سرحدونو په برخه کې د امنیت په تړاو اندېښنه څرګنده کړې ده.
خلیلزاد پخپلو څرګندونو کې ویلي چې د سفر هدف یې د افغان سولې په تړاو د سیمهییزې اجماع رامنځته کول دي.
نوموړی پر داسې مهال تاجکستان هېواد ته سفر کوي چې لاهم د افغان سولې مرکچي پلاوي د بین الافغاني خبرو پر کړنلاره نه دي سلا شوي.
دواړه لوري ډاډ ورکوي چې د اختلافي مواردو تر حل وروسته به په رسمي ډول مذاکرات پیل شي.
کلید ګروپ په ټویټر او فیسبوک کې وګورئ
