ارګ څخه په خپره شوې خبر پاڼه کې ویل شوي چې دا شورا په هېواد کې د سراسري سولې په اړه د ملي اجماع د رامنځته کېدو او د هغه سیاسي توافق پر اساس جوړه شوې چې جمهور رییس غني او ډاکټر عبدالله ترمنځ شوی و.
سرچېنه زیاتوي چې ددې شورا لپاره د ۴۶کسانو نومونه ورلېږل شوي او ملي روغې جوړې عالي شورا ته یې یوه اونۍ وخت ورکړی چې د شورا د عمومي مجمع د غړو لېست نهایي کړي.
د ارګ لخوا په ۴۶کسیز نوملړ کې مخکنی جمهور رییس حامد کرزی، عبدالرب رسول سیاف، انجینر ګلبدین حکمتیار او یو شمېر نور پخواني جهادي قوماندانان، اوسني حکومتي چارواکي، د میرمنو استازې او مصالحې د عالې شورا د رهبرۍ هیت غړي شامل دي.
جمهوري ریاست د ملي روغې جوړې د عالي شورا فرمان داسې مهال خپروي چې د افغان حکومت او طالبانو د استازو تر منځ بین الافغاني خبرې ځنډېدلې دي.
دا په داسې حال کې ده چې طالبانو ویلي تر هغې به بین الافغاني خبرې پیل نه کړي ترڅو چې یې پاتې بندیان خوشي شوي نه وي.
بل لور ته حکومت بیا له طالبانو د خپلو اسیرانو غوښتنه کوي او وایي چې افغان سرتیري خوشي شي نو پاتې ۳۲۰طالب بندیان به هم آزاد شي.
کلید ګروپ په ټویټر او فیسبوک کې وګورئ
