د مصالحې عالي شورا مشر ډاکټر عبدالله عبدالله وایي ټاکل شوې چې راتلونکې اونۍ د افغان حکومت او طالبانو ترمنځ بین الافغاني خبرې پیل شي.
نوموړي د پنجشنبې ورځ د جګړې او سولې مطالعاتو انسټیټیوټ کې د خپلو خبرو په دوام وویل مشورتي لویې جرګې ثابته کړه چې افغانان سوله غواړي او ددې سولې لپاره قرباني هم ورکولی شي.
ډاکټر عبدالله همدارنګه وویل له طالبانو سره د خبرو پر مېز به د مذاکراتو مرکچي پلاوی پرېکنده دریځ ولري او د افغانانو د غوښتنو مطابق به دفاع وکړي.
لا تر اوسه نه ده معلومه چې دا پلاوی به کله قطر ته روانېږي او طالبانو هم راتلونکې اوونۍ د بین الافغاني خبرو پیلېدل نه دي تائید کړي.
یادې ډلې د دې خبرو د پیلو لپاره د افغان حکومت له زندانونو د څلور سوه پاتې طالب زندانیانو خوشي کېدل یو شرط بللی و.
افغان حکومت له دې ډلې ۸۰ زندانیان خوشي کړي دي، خو د پاتې زندانیانو د برخلیک په هکله حکومت تر دې دمه کومه پرېکړه نه ده کړې.
کلید ګروپ په ټویټر او فیسبوک کې وګورئ
