د کورنیو چارو وزارت په بلخ ولایت کې د یوې چاودنې خبر ورکوي.
ددغه وزارت ویاند طارق ارین په خبره چاودنه نن سهار نهه بجې د یاد ولایت بلخ ولسوالۍ اړوند یوه حیواني کلینیک ته نږدې سیمه کې شوې ده.
د ۲۰۹ شاهین ویاند حنیف رضایي وایي چې د بلخ ولسوالۍ په نننۍ پېښه کې یو کمانډو سرتېری وژل شوی، شپږ نور ټپیان دي او همدارنګه په دغه پېښه کې ۳۵ پورې ملکي وګړي هم ټپیان شوي دي.
د بلخ ولایت د امنیه قوماندانۍ ویاند عادل شاه عادل وایي، دغه موټر بم برید په بلخ ولسوالۍ کې د افغان کمانډو قطعې پر امنیتي پوسته تر سره شوی دی.
وسله والو طالبانو ددغې چاودنې مسوولیت منلی او ګڼو سرتیرو ته د مرګ ژوبلې اړولو ادعا کوي.
د یادونې وړه ده چې وړمه شبه دغزني ولایت د دهیک ولسوالۍ پر مرکز موټر بم برید ترسره شو چې د چارواکو په خبره پکې ۳سرتیري ووژل شول او نهه تنه نور یې ټپیان کړل.
د غزني د موټر بم برید مسؤلیت وسله والو طالبانو په غاړه اخیستی و.
کلید ګروپ په ټویټر او فیسبوک کې وګورئ
