هغه اکسیوز خبري شبکي ته په خبرو کې څرګنده کړې چې په راتلونکې نومبر میاشت کې د امریکا تر ټاکنو پورې به په افغانستان کې د امریکایي پوځیانو شمېر د ۴ او ۵ زرو ترمنځ وي.
ده زیاته کړې، په افغانستان کې د امریکایي پوځیانو د شمېر کمولو په اړه خبرې روانې دي او ډېر ژر به هلته یوازې ۴۰۰۰ امریکایي پوځیان پاتې شي.
یاده دې وي چې امریکا په تېره فبرورۍ میاشت کې له طالبانو سره د دوحې په تړون کې ژمنه وکړه چې په تدریجي ډول به خپل سرتیري له افغانستانه وباسي.
امریکا د دې ګام لپاره طالبانو ته د اوربند او د بین الافغاني خبرو د پیلولو شرطونه ایښي دي، خو تر دې دمه په دې دواړو برخو کې کوم پرمختګ نه دی شوی.