د امریکا کانګریس د ایغور مسلمانانو د ځورولو، بندي کولو او د هغوی پر وړاندې د تبعیضي چلند له کبله پر چین د بندیزونو طرحه تصویب کړه.
دا طرحه پرون د امریکا د ولسي جرګې له لوري تصویب شوې او د لاسلیک لپاره سپینې ماڼۍ ته لېږل شوې ده.
د کانګریس تصویب شوې مصوبه د امریکا پر حکومت فشار راوړي، څو له همدې کبله د چین د کمونېست حزب پر رییس بندیزونه ولګوي.
رسنیو ته داسې اسناد رسېدلي چې د چین حکومت په سیستماتیک ډول سلګونه زره ایغور مسلمانان بندخونو ته اچولي او د هغوی د مغزونو د منځلو هڅه یې کړه ده.
خو د چین حکومت په ځلونه د مسلمانانو ځورول رد کړي او زیاته کړې یې ده چې د حکومت له خوا نیول شوو مسلمانانو ته حرفوي او فني زده کړې ورکول کېږي.
په ورته وخت کې د بشري حقونو نړیوال سازمان هم ویلي، د چین حکومت هڅه کوي، هغه مسلمانان د خپلو عقیدو پرېښودو ته اړ کړي، چې همدا اوس یې بندیان کړي دي.
