د سعودي حکومت د ۲۹۸ دولتي کسانو د نیولو خبر ورکوي او زیاتوي چې له دغو کسانو به د فساد په تړاو پوښتنې او پلټنې وشي.
د سرچینې په خبره، په نیول شوو کسانو کې د پوځ افسران، پولیس او ورته نور کسان شامل دي، چې د بډو او له خپلې څوکۍ په ناسمې ګټې اخیستنې تورن دي.
دا په داسې حال کې ده، چې د سعودي حکومت په ۲۰۱۷ میلادي کال کې هم له فساد سره د مبارزې په چوکاټ کې د دغه هېواد لسګونه دولتي کسان د بډو اخیستلو په تور ونیول.
د سعودي عربستان د حکومت له فساد سره د مبارزې کمېټې هم دغه خبر تایید کړی او ویلي یې دي، چې یادو کسانو د ۳۷۹ میلونه ریالو او ۱۰۱ میلیون ډالرو پر بډو اخیستو اعتراف کړی دی.
دې کمېټې په دې تړاو نور جزیات نه دي ورکړي.
