د پکتیکا عالي دارالمعلمین مشر محمد اسحاق ارین کلید ته وویل، تېر کال په ارګون ولسوالۍ کې ۶ نجونې فارغې شوې وې، خو سږ کال په یوسف خېل او ارګون کې ۲۴ نجونو له دارالمعلمین څخه د فراغت سندونه تر لاسه کړل.
هغه څرګندوي، چې تر راتلونکو درې کلونو به د پکتیکا له دارالمعلمین څخه نېږدي ۱۰۰ نجونې فارغې شي، چې دا به د دغه ولایت د ښځینه ښوونکو د کمښت ستونزه هواره او زده کړو ته به د نجونو لېوالتیا ډېره کړي.
د پکتیکا پوهنې ریاست تدریسې مرستیال محمد نسیم واجد وايي، د یونیسف موسیسې په مالي مرسته تر دې وړاندې هم له دارالمعلمین څخه همدا ډول نجونې فارغې شوې دي.
هغه وویل، په دغه ولایت کې د ښځینه ښوونکو کمښت لویه ننګونه ده او په وینا يي پلان لري چې دا پروګرام نورو ولسوالیو ته هم وغځوي او د ښځینه ښوونکو تشه په بشپړه توګه ډکه کړي.
پر همدې مهال د ارګون ولسوالۍ اوسېدونکي عبدالوهاب کلید ته وویل، د پخوا په پرتله په دې سیمه کې د نجونو د زده کړو پر وړاندي د خلکو فکرونه جوړ شوي او ډېری هغه يي اوس د نارینه اولادنو تر څنګ په لوڼو هم زده کړي کوي.
نوموړی څرګندوي، دا څه بسنه نه کوي، پکتیکا د پراخي اراضي او ډېر نفوس لرونکی ولایت دی او د نجونو د زده کړو په برخه کې لا ډېر کار ته پکي اړتیا تر سترګو کېږې.
یاده دې وي چې د پکتیکا په ځينو سیمو کې لا هم ناوړه کلتوري رواجونه واکمن دي او ډېر کله خلک زړه نه ښه کوي، چې خپلې لوڼې ښوونځي ته ولېږې.
