د غزني د ده يك ولسوالۍ ولسوال فضل الرحمان نظروال له وسله والو طالبانو سره په نښته كې ټپي شو.
د دغه ولايت د والي وياند محمد عارف نوري وايي، نظروال د طالبانو د ځپلو په هدف په پيل شوو تصفيوي عملياتو کې د امنيتي سرتېرو ترڅنګ حضور درلود، چې د جمعې په ورځ له غرمې وروسته د يادې ولسوالۍ په رامك سيمه كې په رامنځته شوې نښته كې په پښه ټپي شوى دى.
نوموړي د ده يك د ولسوال روغتيايي حالت د ډاډ وړ باله او ويې ويل، چې په كابل كې يې درملنه روانه ده.
د نوري په خبره، په ياده نښته كې درې طالبان وژل شوي دي.
وسله والو طالبانو بيا ادعا كړې، چې د غزني په ده يك ولسوالۍ كې يې پنځه افغان سرتېري وژلي او د دې ولسوالۍ د ولسوال په ګډون يې درې تنه نور ټپيان كړي دي.
