د افغانستان د سولې لپاره د امريكا د بهرنيو چارو وزارت ځانګړي استازي زلمي خليلزاد د جمعې په ورځ پاكستان ته د سفر په مهال د دغه هېواد د بهرنيو چارو له وزير شاه محمود قريشي، لوى درستيز قمر جاوېد باجوه او ځينو نورو چارواكو سره وليدل.
په اسلام اباد كې د امريكا سفارت د يوې خبرپاڼې په خپرولو سره ويلي، چې خليلزاد په دې ليدنو كې د متحدو ايالتونو او طالبانو ترمنځ د سولې مذاكراتو د وضعيت په اړه بحثونه وكړل.
د سرچينې په وينا، د امريكا ياد ځانګړي استازي په افغانستان كې د تاوتريخوالي كمېدو، اوربند ټينګېدو او د بين الافغاني مذاكراتو د برياليتوب په برخو كې د پاكستان ملاتړ وستايه.
بل پلو خليلزاد پر اقتصادي او امنيتي ګټو، چې د سولې بهير د بريا په صورت كې ترلاسه كېږي، ټينګار وكړ.
نوموړي اسلام اباد ته وروسته هغې سفر وكړ، چې په قطر كې د امريكايي او طالب استازو ترمنځ د سولې خبرې د لنډې مودې لپاره وځنډېدې.
کلید ګروپ په ټویټر او فیسبوک کې وګورئ
