امريكا وايي، په سيمه كې د ايران د چلند په اړه اندېښنو ته په كتو منځني ختيځ ته د زرګونو نورو امريكايي سرتېرو پر لېږلو غور كوي.
د متحدو ايالتونو د دفاع وزارت د پاليسۍ چارو مرستيال جان راډ پرون كانګرېس ته وويل، واشنګټن د ايران چلند په اندېښنې سره څاري.
نوموړي منځني ختيځ ته د تلونكو امريكايي سرتېرو كره شمېر په ډاګه نه كړ، خو په دې تړاو يې د والسټريټ ژورنال ورځپاڼې راپور رد كړ.
دغې ورځپاڼې په دې وروستيو كې راپور وركړى و، چې پنټاګون يادې سيمې ته د شاوخوا ۱۴ زرو امريكايي سرتېرو پر لېږلو غور كوي.
د امريكا د دفاع وزارت وياندې اليسا فرح هم دا شمېر رد كړى و.
يوه ځايي چارواكي د نوم نه ښودلو په شرط امريكايي رسنيو ته ويلي، دا شمېر به د پنځو او اوو زرو ترمنځ وي او پر هغو ۱۴ زرو سرتېرو به اضافه شي، چې د روان ميلادي كال له مې مياشتې راهيسې منځني ختيځ ته لېږل شوي دي.
