د هلمند په مارجې ولسوالۍ كې د افغان ځواكونو د عملياتو په ترڅ كې اوو وسله والو طالبانو ته مرګ ژوبله اوښتې ده.
د دې ولايت له امنيه قوماندانۍ څخه نن كليد ته په رالېږل شوې خبرپاڼه كې راغلي، د هغو عملياتو په مهال، چې د مارجې ولسوالۍ د نيولو په هدف روان دي، څلور طالبان وژل شوي، درې تنه نور ټپيان شوي او ځينې سيمې د افغان سرتېرو لاس ته ورغلې دي.
د سرچينې په خبره، عمليات كوونكو ځواكونو د طالبانو ۲۱ ماينونه، يو شمېر وسايط او يوه اندازه تجهيزات هم له منځه وړي دي.
وسله والو طالبانو تراوسه په دې اړه څه نه دي ويلي.
