د بغلان امنيتي مسوولين وايي، په دغه ولايت كې ټرافيكي پېښې لسګونه كسان ټپيان كړي دي.
د بغلان د امنيه قوماندانۍ وياند جاوېد بشارت كليد ته وويل، نن سهار يو ۴۰۴ ډوله مسافر وړونكى موټر، چې له كابله كندوز ته روان و، د بغلان په ګرداب سيمه كې له سړكه وتلى او اوبو ته لوېدلى دى.
د هغه په وينا، په دې پېښه كې، چې د موټر چلوونكي د بې احتياطۍ له كبله رامنځته شوې، يو تن وژل شوى او ۴۰ نور ټپيان دي.
په همدې حال كې د بغلان د عامې روغتيا رياست سرچينو ويلي، چې په ياده پېښه كې درې تنه وژل شوي او ۵۷ نور ژوبل دي.
د روغتيايي چارواکو په خبره، په هېواد کې د ځانمرګو بريدونو په پرتله د ټرافيکي پېښو د مرګ ژوبلې کچه لوړه ده.