د لبنان لومړي وزیر سعد الحریري په دغه هېواد کې د روانو لاریونونو له کبله له خپلې دندې استعفا وکړه.
دا لاریونونه د حکومت د هغه پلان پر ضد پیل شول چې غوښتل یې د زنګ وهلو لپاره د وټس اپ پر کارولو مالیه ولګوي.
که څه هم حکومت وروسته دا پلان لغوه کړ، خو لاریونونو زور واخیست او خلکو په لبنان کې د سیاسي فساد او اقتصادي بحران په ضد احتجاجونو ته دوام ورکړ.
لبنان دا مهال په ټوله نړۍ کې یو تر ټولو ډېر پوروړی هېواد دی. د تېرو لسو ورځو راهیسې په دې هېواد کې ټول بانکونه تړل شوي دي.
