د عراق په مختلفو ښارونو كې په دولت ضد لاريونونو كې د امنيتي سرتېرو په ګډون سلګونو تنو ته مرګ ژوبله اوښتې ده.
د راپورونو له مخې، اعتراض كوونكي د جمعې په ورځ هم په پايتخت بغداد او د عراق په څو نورو ښارونو كې سړكونو ته را ووتل، چې د تاوتريخوالي له كبله لږ تر لږه ۴۰ لاريون كوونكي وژل شوي او له ۲۰۰۰ زيات نور ټپيان دي.
د عراق دولت اعلان كړى، چې د دې هېواد په بېلابېلو ښارونو كې د نښتو په نتيجه كې لږ تر لږه ۶۸ پوليس هم ژوبل شوي دي.
د راپورونو پر بنسټ، اعتراض كوونكو پرون پر دولتي ودانيو، د ګوندونو پر دفترونو او د سيمه ييزو وسله والو ډلو په ځانګړې توګه د ايران حكومت ته د نېږدې ډلو پر دفترونو بريدونه وكړل.
دا لاريونونه د روانې اكټوبر مياشتې له لومړۍ نېټې راهيسې په عراق كې د فساد، بې كارۍ او نورو ټولنيزو ستونزو د زياتوالي په وړاندې پيل شوي، چې له كبله يې تر دا مهاله شاوخوا ۲۰۰ تنه وژل شوي او ۸۰۰۰ نور ژوبل شوي دي.
