د عراق پوځ وايي، داعش ډلې د دغه هېواد په شمال کې د تېلو پر ذخيرو بريد کړى، دوه تنه يې وژلي او درې نور يې ټپيان كړي دي.
د عراق پوځ د يوې بيانيې په خپرولو سره ويلي، چې ياد بريد د دې هېواد د شمالي برخې د صلاح الدين په سيمه کې شوى دى.
په ورته وخت کې د پېښې په سيمه کې پر عراقي ځواکونو د سړک غاړې ماين چاودنه کړې، چې په دغه پېښه کې درې امنيتي سرتېري ژوبل شوي دي.
عراقي ځواکونه که څه هم دا کار د داعش ډلې بولي، خو تراوسه يادې ډلې په دې تړاو خپل نظر نه دى څرګند کړى.
په يوه بل خبر کې ويل شوي، چې امريکايي ځواکونو ۱۵۰۰ داعشۍ مېرمنې له سوريې نه عراق ته انتقال کړې دي.
تر دې وړاندې عراقي چارواکو خبر ورکړى و، چې امريکا له سوريې څخه عراق ته د داعش وسله والو د لېږد هوډ لري.
د امريکا حکومت تر دا مهاله په دې اړه څه نه دي ويلي.
