د كابل ښار د دوهمې ناحيې په مربوطاتو كې د چسپكي ماين چاودنې يو تن ټپي كړى دى.
د كورنيو چارو وزارت وياند نصرت رحيمي وايي، تېر ماښام شاوخوا شپږ بجې او ۱۵ دقيقې د كابل ښار پر اسمايي واټ د دغه وزارت په يوه رېنجر موټر پورې نښلول شوي ماين چاودنه وكړه.
د نوموړي په خبره، په دې پېښه كې د كورنيو چارو وزارت د سټف كالج يو كاركوونكى په سطحي توګه ټپي شو.
رحيمي همدارنګه وايي، پوليسو تېره شپه شاوخوا اته بجې او ۴۰ دقيقې د قوي تخريبي موادو لرونكى يو ماين، چې ترهګرو د كابل ښار د اتمې امنيتي حوزې اړوند د كارته نو سيمې د لومړي سړك د ګلدان په منځ كې ځاى پر ځاى كړى و، كشف او شنډ كړ.
بل پلو د كورنيو چارو وزارت نن ويلي، د کابل د امنيه قوماندانۍ منسوبينو يو ماين، چې وسله والو طالبانو د دې ولايت په ده سبز ولسوالۍ کې د امنيتي ځواکونو د ګزمې پر مسير ځای پر ځای کړی و، کشف او شنډ کړی دی.
وسله والو طالبانو تراوسه په دې تړاو څه نه دي ويلي.
