د ملګرو ملتونو د ماشومانو د ملاتړ اداره يونيسف وايي، په ۲۰۱۸ ميلادي کال كې د افغانستان، سوماليا، جنوبي سوډان، سوريې او يمن په څېر جګړه ځپلو هېوادونو كې څه باندې ۲۹ ميليونه ماشومان زېږېدلي دي.
يونيسف په خپل تازه راپور کې ويلي، چې تېر ميلادي كال په هرو پنځو نوو زېږېدلو ماشومانو كې له يوه زياتو په خطرناک او له تاوتريخوالي ډک چاپېريال کې نړۍ ته سترګې غړولې دي.
دا په داسې حال كې ده، چې ګڼ شمېر افغان ماشومان له درنو كارونو سره مخ او له زده كړو بې برخې دي او راتلونكې يې روښانه نه ښكاري.