د جمهوري رياست وياند صديق صديقي وايي، د سولې بهير ته د طالبانو د نه ژمنتيا له كبله د ملي يووالي حكومت د جمهوري رياست ټاكنو تر ترسره كولو پورې په دې برخه كې خپلې هڅې درولې دي.
هغه نن يوې خبري غونډې ته وويل، اوسمهال د افغان حكومت لومړيتوب د جمهوري رياست ټاكنو ترسره كول دي او د سولې بهير مخته وړل به د راتلونكي حكومت مسووليت وي.
د صديقي په وينا، په قطر كې د طالبانو سياسي دفتر د سولې بهير ته ګټه نه ده رسولې او نورو هېوادونو ته د دې دفتر د غړو سفرونه او د افغانستان د سولې په اړه به يې بحثونه بې پايلې وي.
دا په داسې حال كې ده، چې د امريكا له لوري له طالبانو سره د سولې خبرو تر لغوه كولو وروسته په قطر كې د دوى د سياسي دفتر يو پلاوى د جمعې په ورځ روسيې ته تللى او د افغانستان لپاره د دې هېواد له ځانګړي استازي ضمير كابلوف سره يې ليدلي دي.
د روسيې تاس خبري اژانس په قطر كې د طالبانو د سياسي دفتر د وياند سهيل شاهين له قوله ويلي، چې په ياده ليدنه كې دواړه لوري د افغان سولې په برخه كې پر وروستيو پرمختګونو وغږېدل.
کلید ګروپ په ټویټر او فیسبوک کې وګورئ
