د امريكا جمهور رئيس ډونالډ ټرمپ وايي، د قطر په پايتخت دوحه كې له طالبانو سره د امريكايي پلاوي خبرې ښې مخته روانې دي، خو دواړه لوري تراوسه له افغانستانه د امريكايي سرتېرو پر وتلو هوكړې ته نه دي رسېدلي.
نوموړي دا څرګندونې د جمعې په ورځ په سپينه ماڼۍ كې خبريالانو ته وكړې.
ټرمپ تر دې يوه ورځ وړاندې ويلي و، چې له طالبانو سره د سولې له هوکړې وروسته به په افغانستان کې ۸۶۰۰ امريکايي سرتېري پرېږدي.
خو طالب سرچينې وايي، له امريکايي لوري سره يې په دوحه کې د روانو خبرو هدف په افغانستان کې د امريکا پوځي حضور پای ته رسول دي، نه د ځواکونو کمېدل.
