امريكا او طالبانو هغه راپورونه رد كړل، چې ګواكې دواړه لوري په افغانستان كې د ۱۴ مياشتني لنډمهالي حكومت پر جوړېدو هوكړې ته رسېدلي دي.
رسنيو د سرچينو له قوله راپورونه خپاره كړي وو، چې د امريكا او طالبانو استازو په افغانستان كې د ۱۴ مياشتني لنډمهالي حكومت پر رامنځته كېدو هوكړه كړې، خو په قطر كې د طالبانو د سياسي دفتر وياند سهيل شاهين په يوه ټويټ كې ياد راپورونه رد كړل.
په همدې حال كې د افغانستان د سولې لپاره د امريكا د بهرنيو چارو وزارت ځانګړي استازي زلمي خليلزاد په يوه ټويټ كې د شاهين خبره تاييد كړه او ويې ويل، د حکومتدارۍ پرېکړې په افغانانو پورې اړه لري، چې په بين الافغاني مذاکراتو کې يې وکړي.
د يادونې وړ ده، چې د جمهوري رياست ټاكنو ځينې كانديدان په هېواد كې د لنډمهاله حكومت پر جوړېدو ټينګار كوي او په اوسنيو شرايطو كې د رڼو او عادلانه ټاكنو ترسره كېدل ناشوني بولي.
کلید ګروپ په ټویټر او فیسبوک کې وګورئ