په هرات کې نن پنجشنبه د هېواد د خپلواکۍ د سلمې کلیزې په مناسب د انګورو او عسلو نندارتون پرانیستل شو.
د کرنې او مالدارۍ وزیر نصر احمد دراني هم په دغو مراسمو کې کډون کړی او د هرات پر کرنیزو محصولاتو یې خوښي څرګنده کړه.
نوموړي زیاته کړه چې کرنیز محصولات په کورنیو او بهرنیو بازارونو کې ښه مناسب بازار لري، خو په دې برخه کې هوایي الوتنو د کرنیزو محصولاتو په لېږد کې ستونزې جوړې کړې دي.
د هرات د کرنې ریاست رییس عبدالصبور رحماني بیا وویل چې په دغه نندارتون کې ۵۳ غرفې شتون لري، چې د هرات ولایت مختلف کرنیز توکي په ځانګړي ډول انګور او شات نندارې ته وړاندې شوي دي.
د هرات د کرنې ادارې د معلوماتو له مخې، په دغه ولایت کې پر اته زره هکتاره ځمکه باغونه جوړ شوي او په پام کې ده چې سږ کال له دغو باغونو ۱۳۵ مټریک ټنه انګور تر لاسه شي.
