د ملي امنيت سلاكار حمدالله محب وايي، امنيت د نظام لپاره لومړيتوب دى او په دې اړه موجودو ګواښونو او ستونزو ته بايد جدي پاملرنه وشي.
د ملي امنيت شورا دفتر تېره شپه د يوې خبرپاڼې په خپرولو سره ويلي، چې محب دا خبره د امنيتي سكټور د مشرتابه په ناسته كې وكړه.
د هغه په وينا، د دولت وسله وال مخالفين د سيمو او ولايتونو په سقوط كې تر ناكامۍ وروسته غواړي پر عامه او له ګڼې ګوڼې پر ډكو ځايونو په بريدونو سره ملكي وګړو ته زيان ورسوي او د خلكو په منځ كې وحشت او وېره خپره كړي.
د ملي امنيت سلاكار امنيتي ارګانونو ته لارښوونه وکړه، چې ټول ګواښونه او حل لارې دې معلومې كړي او په جديت سره دې يې مخه ونيسي.
بايد وويل شي، چې د امريكا او طالبانو ترمنځ د سولې له خبرو سره هممهاله په هېواد كې ځانمرګي بريدونه او وسله والې جګړې زياتې شوي، چې ډېرى قربانيان يې ملكي وګړي وي.
