د پکتیکا ولایت سلګونه اوسیدونکي په دې ولایت کې د نوي کابلبانک له خدماتو شکایتونه لري او وايي په شپو او ورځو يي په بانک کې کارونه نه خلاصیږې.
د شکایت کوونکو په ډله کې دولتي مامورین، نظامي کسان، ښوونکي، خصوصي پانګوال او نور کسان شامل دي.
دوی وايي په بانک کې د مامورینو د کمښت او خراب سیستم له امله هره ورځ په سلګونه کسان پرته له معاش اخیستلو او نورو تجارتي معاملو خپلو کورونو ته ځي.
د یوسف خېل ولسوالۍ ولسوال دولت خان وویل له تېرو پنځو ورځو را په دې خوا هره ورځ بانک ته د پیسو اخیستلو لپاره مراجعه کوي .
نوموړی وايي د بانک په مدیریت کې ستونزي موجودي دي ، مامورین يي کم دي او خلکو ته قناعت کوونکي خدمات نه شي وړاندي کولای.
غازي خان د یادو کسانو په کتار کې ولاړ هغه کس دی چې د ښرنې زرمت د لويي لاري د امنیت ساتلو لپاره ګمارل شوی دی.
نوموړی وايي په ډير بد حالت کې له هغه ځایه د خپل معاش د اخیستلو لپاره راغلی ، خو مجبور دی په ورځو ورځو انتظار وکړي.
ملي تجار محمد جلیل کټوازي له کلید راډيو سره د خبرو پر مهال وویل ډيری کسان له لیري پرتو ولسوالیو راخي ، دلته يي کارونه نه خلاصیږي او اړ دي په ورځو ورځو په هوټلونو کې ورته انتظار وباسي.
کټوازی وايي په بانک کې د لسو غرفو له ډلي په دوو کې مامورین کار کوي او په وینا يي نوري ټولې خالي پاتي دي.
د خیرکوټ ولسوالۍ اوسیدونکی محمد عارف وايي د اختر په را نږدي کیدو هر څوک پیسو ته اړتیا لري او غواړي خپل معاشونه واخلي.
دی وايي له تېرو څلورو ورځو راهیسي د خپل معاش اخیستلو ته د بانک په کتارونو کې ولاړ وي، خو تر اوسه نوبت نه دی ور رسیدلی.
هڅه مو وکړه په دې اړه په پکتیکا کې د نوي کابلبانک د مسولینو نظر هم له ځان سره ولرو، خو هغوی له خبرو کولو ډډه وکړه او وايي چې مرکزي ادارې دوی له رسنیو سره له خبرو کولو منع کړي دي.
