د هلمند په نهر سراج ولسوالۍ کې د افغان ځواکونو او وسله والو طالبانو ترمنځ په نښتې او هوايي بريد كې نهه طالبان وژل شوي دي.
د دې ولايت د امنيه قوماندانۍ له مطبوعاتي دفتره کليد ته په رالېږل شوې خبرپاڼه کې راغلي، تېره ورځ ناوخته د نهر سراج ولسوالۍ په مالګير سيمه کې طالبانو غوښتل د پوليسو پر يوې امنيتي پوستې بريد وکړي، چې د پوليسو له سخت غبرګون سره مخ شول.
د سرچينې په وينا، د دواړو خواوو ترمنځ د نښتې او هوايي بريد په مهال نهه طالبان وژل شوي او د هغوى يوه اندازه وسلې او مهمات پوليسو ترلاسه كړي دي.
د سرچينې پر بنسټ، په ياده نښته كې پوليسو ته کوم زيان نه دى اوښتى.
وسله والو طالبانو تراوسه په دې اړه خپل نظر نه دى څرګند كړى.
