په غزني كې د امنيتي ځواكونو په نښتې او عملياتو كې درې امنيتي سرتېري او ۱۴ وسله وال طالبان وژل شوي دي.
د دې ولايت د والي وياند محمد عارف نوري وايي، طالبانو تېره شپه د خوږياڼو ولسوالۍ پر مركزي قرارګاه بريد وكړ، چې په ترڅ كې يې د يادې ولسوالۍ د امنيه قوماندانۍ د سرپرست سميع الله پوپل په ګډون درې امنيتي سرتېري ووژل شول او پنځه نور ټپيان شول.
نوموړى زياتوي، هلته د شاوخوا يو ساعته جګړې په مهال څلور طالبان هم وژل شوي او ګڼ شمېر نور ژوبل دي.
د نوري په وينا، ځانګړو افغان ځواكونو تېره شپه د قره باغ ولسوالۍ په چتل خېل سيمه كې عمليات ترسره كړي، چې له كبله يې ۱۰ طالبان وژل شوي او د هغوى ګڼ شمېر وسلې، مهمات او چاودېدونكي توكي نيول شوي دي.
وسله والو طالبانو بيا په غزني كې د ۲۱ افغان سرتېرو د وژلو او ۱۰ نورو د ټپي كولو ادعا كړې ده.
