د كابل پوهنتون د ورودي دروازې مخې ته ځانمرګي بريد ۴۱ تنو ته مرګ ژوبله واړوله.
د كابل امنيه قوماندانۍ وياند فردوس فرامرز خبريالانو ته وويل، نن سهار شاوخوا اووه بجې او ۱۰ دقيقې يوه ځانمرګي بريد كوونكي، چې په كرولا ډوله موټر كې سپور و، د كابل پوهنتون د ورودي دروزاې مخې ته خپلو چاودېدونكو توكو ته چاودنه وركړه.
د هغه په وينا، په دې پېښه كې درې ملكي وګړي او يو ټرافيك پوليس وژل شوي او د ملكيانو په ګډون ۱۶ تنه ټپيان دي.
فرامرز زياته كړه، امنيتي ځواكونو د پېښې په ځاى كې دوه چسپكي ماينونه كشف او شنډ كړل.
خو د عامې روغتيا وزارت وياند وحيدالله مايار پر خپله ټويټر پاڼه ليكلي، چې د پېښې له ځايه اته جسدونه او ۳۳ ټپيان روغتونونو ته لېږدول شوي دي.
د ياد ځانمرګي بريد مسووليت تر دا مهاله چا پر غاړه نه دى اخيستى او وسله والو طالبانو په كې خپل لاس لرل رد كړي دي.