د ملي يووالي حكومت هيله څرګندوي، چې په راتلونو څو اونيو كې د امريكا او طالبانو د استازو ترمنځ په خبرو كې د سولې لومړنۍ هوكړه وشي.
د جمهوري رياست وياند صديق صديقي نن كليد ته وويل، افغان حکومت او نړيواله ټولنه په ګډه هڅه کوي د افغانستان روانې جګړې ته د پاى ټکى کېږدي.
د هغه په وينا، د افغان سولې بهير په برخه كې د افغانستان د حكومت او نړيوالې ټولنې ترمنځ همغږي موجوده ده.
دا په داسې حال كې ده، چې ټاکل شوې په راتلونكو څلورو يا شپږو اونيو کې امريكايي او طالب استازي د افغان سولې په تړاو بيا سره كېني.
