slideshow

42
۲۱ چنګاښ ۱۳۹۸
لیکونکی: فضل الهادي حميدي

کابل مېشتي بغلانیان په خپل ولایت کې له زياتېدونكې ناامنۍ شکایت کوي


یو شمېر کابل مېشتي بغلانیان په خپل ولایت کې له ورځ تر بلې زیاتېدونکې ناامنۍ شکایت کوي او وایي، دولت ورته هېڅ پام نه کوي.
په کابل کې د مرکزي بغلان د خلکو د انسجام شورا وایي، روان وضعیت په بغلان کې د عامو خلکو ژوند تریخ کړی دی.
د دغې شورا د مشر جمعه خان تلیق په خبره، د بغلان په ډېری سیمو کې جګړې روانې دي، خو دولت ورته پاملرنه نه ده كړې.
نوموړی زياتوي، د بغلان ناامنۍ د کابل – شمال لویه لار هم ناامنه کړې او کله ناکله دا لار د مسافرو پرمخ هم تړل کېږي.
په داسې حال کې، چې تېره اونۍ په بغلان كې د دولتي او بهرنیو ځواکونو د ګډو عملیاتو په مهال په هوایي بریدونو کې د یوې کورنۍ اووه غړي ووژل شول، د دغه ولایت دوه تنه نور اوسېدونکي نعمت الله او عبدالقاهر خالقي وایي، د بغلان ناامنیو د ملکي خلکو ژوند تر دې بریده تریخ کړی، چې خلک د جګړو په سیمو کې خپل ټول شته پرېږي او خپلې پښې سپکوي او آن په ډېری سیمو کې خو د عامو خلکو ژوند هم خوندي نه دی.
دوی د جګړې له ښکېلو لورو د سولې او په لومړي ګام کې د اوږدمهاله اوربند غوښتنه کوي.
خو د ملي دفاع وزارت ویاند روح الله احمدزی وایي، ملي اردو په ټولو هغو سیمو کې، چې د امنیتي ګواښونو کچه په کې لوړه ده، عملیات کوي او په وینا یې، ډېر ژر به په بغلان کې د ناامنۍ کچه را ټیټه شي.
د ملي دفاع وزارت ویاند په ورته وخت کې د ملکي مرګ ژوبلې په تړاو د اندېښنو په ځواب کې وایي، د ملکي مرګ ژوبلې مخنیوی د دوی د کارونو په سر کې دی او په خبره یې، ټولو امنیتي او دفاعي ځواکونو ته د ملکي وګړو د خوندیتوب لازمې لارښوونې کېږي.
د یادولو وړ ده، چې د ملکي مرګ ژوبلې وروستۍ پېښې، څو ورځې وړاندې په بغلان کې د یوې کورنۍ د اوو غړو وژل کېدل او د یوه بل غړي ټپي کېدل و او له دې پېښې سره هممهاله په ميدان وردګو کې پر یوه روغتون د شپنیو عملیاتو په ترڅ کې د څلورو تنو روغتیایي کار کوونکو وژل کېدل او د لسو نورو ټپي کېدل وو.

 

شریکول
ایمیل *
نوم *
ستاسو څرګندونې *