امريكا د ښځو د فوټبال د نړيوال جام په پايلوبه كې، چې د يكشنبې په ورځ په فرانسې كې ترسره شوه، هالنډ ته د صفر په مقابل كې په دوو ګولونو ماتې وركړه او د خپلې اتلولۍ دفاع يې وكړه.
د پايلوبې په لومړۍ نيمايي کې دواړو لوبډلو ښه لوبه وکړه، خو امريکا په دویمه نيمايي کې دوه ګولونه ووهل او د څلورم ځل لپاره يې نړيوال جام خپل كړ.
د امريکا د ښځو د فوټبال لوبډله تر دې وړاندې په ۱۹۹۱، ۱۹۹۹ او ۲۰۱۵ ميلادي كلونو كې هم د فوټبال د نړيوال جام سيالو اتله شوې وه.
د هالنډ د ښځو د فوټبال لوبډله، چې د اروپا اتله ده، د دوهم ځل لپاره د نړيوال جام سياليو پايلوبې ته وتلې وه.
د ښځو د فوټبال د نړيوال جام په سږنيو سياليو كې د ۲۴ هېوادونو لوبډلې ولوبېدې، خو د امريكا لوبډله په كې تر ټولو ښه وځېلده او تر ټولو ډېر ۲۶ ګولونه يې ووهل.
کلید ګروپ په ټویټر او فیسبوک کې وګورئ
