د قطر په پايتخت دوحه كې د امريكا او طالبانو د استازو ترمنځ اووم پړاو خبرې د يوې ورځې لپاره ودرول شوې.
طالب وياند ذبيح الله مجاهد پر خپله ټويټر پاڼه ليكلي، د جمعې ورځې د رخصتۍ له كبله به نن مذاكرات ونه شي او سبا به د دواړو لورو ترمنځ خبرې بېرته پيل شي.
يادې خبرې د تېرې شنبې په ورځ پيل شوې دي.
امريكايي او طالب چارواكو د دغو مذاكراتو تر پيل وړاندې رسنيو ته ويلي وو، دا ځل هڅه كېږي له افغانستانه د بهرنيو ځواكونو د وتلو لپاره د زماني جدول پر ټاكلو او د امريكا او متحدينو په ضد يې د افغانستان له خاورې د نه استفادې لپاره د طالبانو پر تضمين وروستۍ هوكړه وشي.
دا په داسې حال كې ده، چې ټاكل شوې د راتلونكو يكشنبې او دوشنبې په ورځو په دوحه كې بين الافغاني غونډه وشي، خو افغان حكومت په كې له ګډونه ډډه كړې ده.
