د امريكا جمهور رئيس ډونالډ ټرمپ د سعودي عربستان له وليعهد محمد بن سلمان سره ليدلي او ويلي يې دي، دا ځواكمن رهبر خارق العاده كار ترسره كوي.
ټرمپ بن سلمان ته، چې جنجال پاروونكې څېره پېژندل كېږي، نن د خپل دوست خطاب وكړ.
دوى د جاپان په اوساكا ښار كې د نړۍ د ۲۰ صنعتي هېوادونو د مشرانو يا جي شل غونډې د وقفې په جريان كې د سهار چاى د څښلو په مهال له يو بل سره خبرې وكړې.
د سعودي خبريال جمال خاشقجي تر وژل كېدو وروسته د سعودي عربستان وليعهد د نړيوالې ټولنې له فشارونو سره مخ شوى دى.
ياد خبريال، چې په امريكا كې اوسېده، تېر ميلادي كال د تركيې په استانبول ښار كې د سعودي عربستان په كونسلګرۍ كې ووژل شو.
د متحدو ايالتونو استخباراتي ادارې دې پايلې ته ورسېدې، چې محمد بن سلمان د خاشقجي د وژلو امر كړى و.
