د کابل – جلال اباد پر لويه لار د لغمان په مربوطاتو كې سيند ته د يو کرولا ډوله موټر د غورځېدو په پېښه کې د يوې کورنۍ دوه غړي ژغورل شوي او څلور يې نادرکه دي.
د لغمان امنيتي چارواکي وايي، ياد موټر تېره شپه شاوخوا نهه بجې او ۳۰ دقيقې د قرغيو ولسوالۍ د مشعلې کمره په سيمه کې سيند ته ولوېد.
د دوى د معلوماتو له مخې، په موټر کې شپږ تنه سپاره وو، چې دوه يې له سينده ژوندي را ايستل شوي او پاتې څلور يې په اوبو كې نادرکه دي، چې د پيدا کولو هڅې يې روانې دي.
په موټر کې سپاره ټول كسان د يوې کورنۍ غړي او د ننګرهار د سره رود ولسوالۍ اوسېدونکي وو.
د پېښې علت د موټر ګړندى تګ او د موټر چلوونکي بې احتياطي ښودل شوې ده.
