جمهور رئيس محمد اشرف غني وايي، له دوو كلونو په كمه موده كې به کابل ښار دوباره په يوه تفريح ځاى بدل شي.
هغه دا خبره تېر مازديګر د کابل ماشين خانې د بيارغونې چارو د ليدلو په مهال وكړه.
جمهور رئيس غني وويل، د نړۍ د ښاري پلان جوړولو له يوې مشهورې کمپنۍ سره له درې كلن کار وروسته د کابل ښار پراختيايي پلان جوړ شوى دى.
نوموړي زياته کړه، دا پلان به ګام په ګام عملي شي او کابل ښار به د سيمې د بهترينو ښارونو يو ښار او تاريخي پايتخت شي.
د هېواد د جمهور رئيس په خبره، د كابل ماشين خانې په سيمه كې د فرهنګي فعاليتونو، کنفرانسونو، کتاب پلورلو، فرهنګي ناستو او تياتر برخې او همدارنګه د صنعتکارو او متشبثو مېرمنو د توليداتو لپاره مارکېټ او دوامداره نندارتون جوړېږي او په يوې منظمې سيمې او عايداتي سرچينې به بدله شي.
علم ګنج باغ، چې وروسته د كابل ماشين خانې په نوم ونومول شو، د اغا خان بنسټ او جرمني په همكارۍ بيا رغول كېږي.
کلید ګروپ په ټویټر او فیسبوک کې وګورئ
