د كورنيو چارو وزارت وايي، د كوچني اختر په درېيو ورځو كې د هېواد په څلورو ولايتونو كې د بېلابېلو پېښو په مهال ۴۶ امنيتي سرتېرو او ملكي وګړو ته مرګ ژوبله اوښتې ده.
د دغه وزارت وياند نصرت رحيمي نن پر خپله فېسبوك پاڼه ليكلي، په ياده موده كې په لوګر، هلمند، بغلان او كاپيسا ولايتونو كې د وسله والو طالبانو د بريدونو او ماين چاودنو له كبله ۱۹ افغان سرتېري وژل شوي او نهه تنه نور ژوبل دي.
د سرچينې په خبره، په دې پېښو كې ۱۱ ملكي وګړي هم وژل شوي او اووه تنه نور ټپيان دي.
رحيمي ويلي، د اختر په دوهمه ورځ د ملي امنيت ځواکونو په کابل کې يو موټر بم نيولی او پوليسو د شپږو ماينونو د چاودېدو مخنيوی کړی دى.
د ده په وينا، امنيتي ځواكونو د اختر په درېيو ورځو كې په ټول هېواد کې د وسله والو طالبانو د ۷۰ بريدونو مخه نيولې، چې ټاكل شوې وه ۳۵ يې په كابل كې ترسره شي.
دا په داسې حال كې ده، چې د وسله والو طالبانو وياند ذبيح الله مجاهد رسنيو ته ويلي، جنګيالي يې په اختر كې په دفاعي حالت كې وو او پر افغان سرتېرو يې هېڅ بريد نه دى كړى.
