۲۰۷ ظفر قول اردو ادعا كوي، چې په هرات او بادغيس ولايتونو كې د جګړې او هوايي بريدونو په ترڅ كې ۴۳ وسله والو طالبانو ته مرګ ژوبله اوښتې ده.
د يادې قول اردو د عامه چارو مرستيال سيد اغا ضياء كليد ته وويل، طالبانو تېره شپه د هرات د شينډنډ ولسوالۍ په جوى غازي سيمه كې د ملي اردو د لومړۍ لېوا پر يوې امنيتي پوستې بريد وكړ، چې د افغان ځواكونو لخوا په شا وتمبول شو.
دى وايي، په دې سيمه كې د جګړې له كبله شپږ طالبان ووژل شول او ۱۳ تنه نور ژوبل دي.
د ضياء په خبره، د ناټو د غوڅ ملاتړ ماموريت ځواكونو د بادغيس په بالامرغاب ولسوالۍ كې د طالبانو پر مركزونو دوه هوايي بريدونه كړي، چې په مهال يې د قوماندان ملا حيات الله په ګډون ۲۰ طالبان وژل شوي او څلور تنه نور ټپيان دي.
وسله والو طالبانو تر دې دمه د دغو پېښو په اړه خپل نظر نه دى څرګند كړى.
کلید ګروپ په ټویټر او فیسبوک کې وګورئ