د امریکا د کانگرس يا ولسي جرګې غړي د هغه افغانانو لپاره د امریکا نورې ويزې غواړي چې په افغانستان کې یې له امریکایي ځواکونو سره کار کړی دی.
د کانګرس غړو په همدې تړاو يوه تازه لايحه وړاندې کړې او په هغه کې ټينګار شوی چې په روان مېلادي کال کې دې هم په شرایطو برابرو افغانانو ته د اس ای وي ځانګړې ويزې ورکړل شي او هغه ستونزې دې له منځه يووړل شي چې افغانانو ته د ويزو په ورکولو کې رامخې ته کېږي.
تر دې وړاندې په ۲۰۱۷ کال کې د امريکا له لوري دغه ډول ويزې ۴۰۰۰ افغانانو ته ورکړل شوې، خو په ۲۰۱۸ کال کې د دې ويزو شمېر ۱۶۵۰ ته راکم شو او داسې راپورونه هم شته چې ټرمپ غواړي سږ کال دغه شمېر ۶۰ فیصده نور هم راکم کړي.
