د امریکايي ځواکونو لوی درستیز جنرال جوزف ډنفورډ وایي، تر هغې چې په افغانستان کې یاغیګري په بشپړه توګه نه وي ختمه شوې، اړتیا ده چې په دې هېواد کې امريکايي سرتېري پاتې شي.
ډنفورډ د کانګریس يوې غونډه ته ويلي، فکر تر هغې چې په افغانستان کې ياغيګري روانه وي دوی هلته خپلو سرتېرو ته اړتيا لري.
ډنفورډ داسې مهال دا څرګندونې کوي چې په قطر کې د امريکايي او طالب استازو تر منځ خبرې روانې دي او د وسله والو طالبانو يو مهم او اساسي شرط له افغانستان د ټولو بهرنيو ځواکونو وتل او يا هغه يو لنډمهالی مهالوېش ټاکل دي.
له بل لوري ځينو طالب او امريکايي چارواکو دا خبره کړې چې له افغانستانه د بهرنيو ځواکونو په وتلو او دا چې افغانستان به د ترهګرۍ په ځاله نه بدلېږي مخکې له مخکې پرې موافقه شوې ده.
خو له بل لوري د ډنفورډ څرګندويي ښيي چې ښايي امريکا په افغانستان کې د اوږدمهال پاتې کېدو لپاره هم پلانونه ولري او د دې حضور لپاره اړه ده چې دلته وسله وال فعاليتونه هم دوام وکړي.
