په كابل كې د مصر سفير هاني صلاح وايي، هېواد يې چمتو دى، چې په امنيتي، لوړو زده کړو، اسلامي او فرهنګي زده کړو او له ترهګرۍ سره د مبارزې په برخو کې له افغانستان سره همکاري وکړي.
نوموړي دا څرګندونې د شنبې په ورځ له غرمې وروسته د افغانستان د ملي امنيت له سلاكار حمدالله محب سره د ليدنې په مهال وكړې.
د ملي امنيت شورا دفتر د خبرپاڼې له مخې، محب په افغانستان کې د افراطيت او تاوتريخوالي په كمولو او مهارولو كې د مصر رول ګټور ياد كړ او له افغان ځوانانو سره يې د زده کړو په برخه کې د دغه هېواد همکاري وستايله.
سرچينه وايي، دواړه چارواكي په افغانستان كې د تاوتريخوالي او افراطيت د له منځه وړلو پر څرنګوالي وغږېدل او په كابل كې د مصر سفير له افغانستان سره د خپل هېواد د اوږدمهاله مرستو پر دوام ټينګار وکړ.
