پخوانى جمهور رئيس حامد كرزى ټينګار كوي، چې د مذاكرې له لارې د افغان سولې لپاره هڅې بايد ونه درول شي، حتى كه د افغانستان حكومت له طالبانو سره د سولې په خبرو كې ګډون هم ونه كړي.
هغه په خپله تازه مركه كې ويلي، له طالبانو سره وروستي مذاكرات سولې ته د رسېدو په هدف يوه ملي هڅه وه او د افغان حكومت د نه ګډون له كبله د دغه بهير درول به جرم او تېروتنه وي.
كرزى وايي، چمتو دى، چې بيا هم د طالبانو له استازو سره خبرې وكړي، حتى كه بيا هم د افغانستان حكومت په كې ګډون ونه لري.
د ده په وينا، كه د امريكا او طالبانو د استازو ترمنځ په راتلونكي پړاو مذاكراتو كې د ګډون بلنه وركړل شي، نو په كې به برخه واخلي.
په پام كې ده، چې روانه ميلادي مياشت په قطر كې ځينې افغان سياستوال د طالبانو له استازو سره د دوهم ځل لپاره وګوري.
د دواړو لورو ترمنځ لومړۍ ليدنه په روسيه كې وشوه، خو افغان حكومت د افغانستان د سولې لپاره ګټوره ياده نه كړه.
کلید ګروپ په ټویټر او فیسبوک کې وګورئ
