د کرنې، اوبو لګولو او مالدارۍ وزارت د کرنې د ودې او کليوالي پراختيا پروژې پر بنسټ په بادغيس کې ۱۷۰ شنې خونې جوړېږي.
دې وزارت نن په يوه خبرپاڼه كې ويلي، هره شنه خونه به ۶۰ متره مساحت او ۷۲ زره افغانۍ لګښت ولري.
په خبرپاڼه كې راغلي، د دغو شنو خونو هدف، چې د بادغيس په قادس، بالامرغاب، جوند او غورماچ ولسواليو کې جوړېږي، د تازه سبزۍ توليد او په لويه کچه د خوړو خونديتوب او په ميندو او ماشومانو کې د خوارځواکۍ مخنيوى دى.
سرچينه وايي، يادې شنې خونې کورنيو ته دا زمينه هم برابروي، چې د خپلو حاصلاتو د پلور له لارې ښه عوايد ترلاسه کړي.
د يادونې وړ ده، چې په شنو خونو کې د ژمي په موسم کې رومي بانجان، بادرنګ، تور بانجان او نورې سبزۍ کرل او بازار ته عرضه کېږي.
