د ايران په شمالي، لوېديځو او جنوب لوېديځو ولايتونو کې د سېلابونو راوتو درانه ځاني او مالي زيانونه اړولي دي.
تر دې مهاله يوازې د فارس ولايت په مركز شيراز کې سېلاب ۱۹ تنه وژلي دي.
سېلابونو ګڼ شمېر کورونه ويجاړ کړي، موټرونه يې له يو بل سره وهلي او د برېښنا مزي يې پرې کړي دي.
ايراني چارواکو ويلي، په شيراز کې سېلاب دومره ژر راووت، چې خبرداري ورکولو ته يې وخت ونه موند.
د چارواکو په خبره، د شيراز سېلاب ۱۹ تنه وژلي او شاوخوا ۱۰۰ نور يې ټپيان کړي دي.
د نورو هېوادونو ترڅنګ امريکا هم، چې له ايران سره يې اړيکې ترينګلې دي، پر وروستيو سېلابونو خواشيني څرګنده کړې او له ايرانيانو سره يې مرستې ته چمتووالی ښودلى دی.
