د افغانستان د سولې لپاره د امريكا د بهرنيو چارو وزارت ځانګړي استازي زلمي خليلزاد په واشنګټن كې د افغانستان لپاره د روسيې، چين او اروپايي ټولنې له ځانګړو استازو ضمير كابلوف، دينګ شي جون او كوبيا سره په جلا توګه كتلي دي.
دغو چارواكو په يوه څلور اړخيزه غونډه كې هم حضور پيدا كړى او پر افغان سولې غږېدلي دي.
خليلزاد نن پر خپله ټويټر پاڼه ليكلي، ټولو لورو د يوه خپلواك هېواد په توګه د افغانستان حاكميت ته پر درناوي ټينګار وكړ او په دې هېواد كې د سولې ټينګېدو غوښتونكي شول.
دى وايي، روسيه، چين او اروپايي ټولنه يو داسې افغانستان غواړي، چې له خاورې يې د هغوى ګټې ونه ګواښل شي.
خليلزاد تر دا مهاله د قطر په پايتخت دوحه كې د طالبانو له استازو سره پنځه وارې ليدلي دي.
دواړو لورو اعلان كړى، چې په مذاكراتو كې يې پرمختګ شوى دى.
کلید ګروپ په ټویټر او فیسبوک کې وګورئ
