د امريکا يوه بې پيلوټه الوتکه د پروان په بګرام ولسوالۍ کې لوېدلې ده.
د پروان د والي ويانده وحيده شهكار وايي، دا بې پيلوټه الوتکه د يکشنبې په ورځ له غرمې وروسته دوه بجې او ۴۵ دقيقې د بګرام ولسوالۍ په باريک اب سيمه كې د تخنيكي ستونزې له كبله نسکوره شوې ده.
نوموړې كليد ته وويل، په دې پېښه کې چا ته زيان نه دى اوښتى.
په افغانستان کې مېشتو امريکايي ځواکونو د دې بې پيلوټه الوتکې د لوېدو خبر تاييد کړى او ويلي يې دي، د پېښې په اړه څېړنې کوي.
خو وسله والو طالبانو ادعا كړې، چې دغه الوتكه دوى را غورځولې ده.
