د کابل پولیس وايي، د دې ښار په ۱۱ ناحيه کې يې د هغې ماشومې دواړه قاتلين نيولي چې هغه يې تښتولې او وروسته وژلې وه.
د کابل امنيه قومندان سيد محمد روشندل نن يوې خبري غونډې ته په خبرو کې وويل، دې کسانو د مهسا په نوم ماشومه د کابل ښار له سه صدو پانزده سيمې تښتولې وه او وروسته يې د هغې له کورنۍ د ۳۰۰ زرو ډالرو غوښتنه کړې وه.
د روشندل په خبره، د دې دوو کسانو يو يې د وژل شوې ماشومې ګاونډی و او د خپل ملګري په مرسته يې دغه ماشومه د پنجصد فاميليو سيمې ته لېږدولې وه.
د کابل پوليسو مشر وايي، په تېرو ۲۴ ساعتونو کې يې د وسله والو غلو يوه ډله هم نيولې ده.
نوموړي دغه راز وويل چې پوليسو په تېرو څو ورځو کې د يو شمېر ترهګريزو بريدونو او ماين چاودنو مخنيوی هم کړی دی.
