د راپورونو له مخې د ملګرو ملتونو امنیت شورا به روانه اونۍ د جیش محمد ډلې د مشر مسعود اظهر نوم د ترهګرو په تور لېست کې شامل کړي.
هند وایي چې هغه په کشمیر کې د دوی پر سرتېرو په یوه خونړي برید کې لاس درلود. دغه وړاندیز، امریکا، برېتانیا او فرانسې کړی دی. دوی وايي چې مسعود اظهر ترهګر دی او د ترهګرو په لېست کې باید شامل کړل شي.
هند بیا هڅه کوي دغه مسئله نهايي کړي او په بشپړه توګه ځان ډاډه کړي چې د جیش محمد ډلې مشر د ترهګرو په لېست کې شامل کړل شوی دی.
چین بیا وايي چې دا مسئله اوږده بحث ته اړتیا لري او له دې وروسته باید له ترهګرۍ د سیاسي وسیلې په توګه کار وا نه خیستل شي.
