يوې ترکۍ ورځپاڼې ادعا کړې، چې امريکايي ځواکونه هڅه کوي په سوريه کې داعش وسله والو ته جعلي پېژندپاڼې ورکړي او په دې ډله کې د هغوى مشر ابوبکر البغدادي هم شامل دی.
يني شفق ورځپاڼې هغه انځورونه خپاره کړي، چې په كې البغدادي په يوه زغره وال امريکايي موټر کې ښکاري.
د دې راپور له مخې، د امريکا مركزي استخباراتي اداره سي آى اې البغدادي څاري، د هغه ۱۴۰ وسله والو ته يې جعلي پېژندپاڼې ورکړي او نوي نومونه يې ورته ټاکلي دي.
يادې ورځپاڼې ويلي، همدا اوس امريکا د کردستان د كارګرو ګوند پي کې کې په کمپونو کې داعش وسله وال را ټولوي او ورته جعلي پېژندپاڼې ورکوي.
يني شفق زياته كړې، داعش وسله والو ته د جعلي پېژندپاڼو ورکړه د امريکا د پټو عملياتو برخه ده او له دې لارې غواړي وسله وال له يوې سيمې بلې ته ولېږدوي.
