په غزې تړانګې كې د لاريونونو په دوام پرون د اسراييلي ځواكونو په بريد كې يو فلسطينى ووژل شو او ۴۴ تنه نور ټپيان دي.
د تېر ۲۰۱۸م ميلادي له مارچ مياشتې راهيسې هره جمعه سلګونه فسلطينيان په غزې تړانګې كې را غونډېږي او د اسراييل په ضد لاريون كوي.
د فلسطين د روغتيا وزارت وايي، د تېرې ورځې په لاريون كې د تيمور عرفات په نوم يوه ۲۳ كلن فلسطيني ځوان خپل ژوند له لاسه وركړى دى.
په ياده سيمه كې د لاريونونو له پيل راهيسې تر دې دمه له ۱۹۰ زيات فلسطينيان وژل شوي او سلګونه تنه نور ژوبل شوي دي.
د اسراييل د اردو وياند ويلي، په غزې تړانګې كې شاوخوا ۸۴۰۰ اعتراض كوونكي را ټول شول او د تيږو او لرګيو په وارولو سره يې پر اسراييلۍ اردو بريد وكړ.
فلسطيني اعتراض كوونكي د اسراييل له حكومته غواړي، چې فلسطيني كډوالو ته د هغوى پخوانيو كورونو ته، چې اوس مهال په اسراييل كې دي، د بېرته ستنېدو اجازه وركړي.
د اسراييل دولت په ۱۹۴۸م ميلادي كال كې جوړ شو، چې په ترڅ كې يې سلګونه زره فلسطينيان له خپلو اصلي سيمو بې ځايه شول.
