وسله وال طالبان وايي، په دوحه کې د دوی او امريکايي پلاوي تر منځ خبرې په تدريجي ډول روانې دي، خو تر دې مهاله کوم مشخص توافق نه دی ترلاسه شوی.
د وسله والو طالبانو د وياند ذبيح الله مجاهد له لوري کليد ته په را استول شوې خبرپاڼه کې راغلي، د خبرو موضوعات خورا مهم او حساس دي او دوی په خورا احتياط پر مخ ځي.
د خبرپاڼې له مخې تر دې مهاله يوازې، د بهرنيو ځواکونو د وتلو او له افغان خاورې چا ته د خطر په نه متوجه کېدو خبرې کېږي.
د هغه په خبره د کوم څه په تړاو هوکړه او سند نه دی لاسليک شوی او په دې تړاو اټکلونه او يو شمېر خبرونه يوازې ګنګوسې دي.
دا پّه داسې حال کې ده چې تر دې وړاندې د درې مياشتيني اوربند او له افغان حکومت سره مستقيمو خبرو ته د طالبانو د چمتو کېدو په تړاو هم خبرونه خپاره شوي و، خو مجاهد ټينګار کړی چې تر دې مهاله لا دې موضوعاتو ته نه دي ور رسېدلي.
